Seksioni “Fjala e të premtes” është një shërbim i Librarisë Dielli, në bashkëpunim me Qendrën Islame të Hamburgut (Islamisches Zentrum Hamburg http://www.izhamburg.com).
Në këtë seksion do të botohen periodikisht ligjëratat (hutbet) e namazeve të Xhumasë, të mbajtura në Qendrën Islame të Hamburgut, nën mbikqyrjen e drejtorit dhe imamit të kësaj qendre, Ajetollah Dr. Riza Ramazani.
Metodologjia
Metoda e zakonshme përbëhet nga organizimi tematik i ligjëratave të xhumasë. Pasi zgjidhet një temë e caktuar, ajo shtjellohet në mënyrë periodike, çdo të premte. Një shembull i tillë janë ligjëratat mbi konceptin e dashurisë, të cilat u mbajtën në Qendrën Islame të Hamburgut, ndërmjet qershorit të vitit 2010 dhe janarit të vitit 2011, në njëzet e tre pjesë.
Edhe në përkthimin në shqip, do ta ndjekim këtë qasje të njejtë. Në seksionin “Fjala e të premtes” do të ketë një kategorizim tematik të ligjëratave. Ligjëratat do të përzgjidhen nga arkivi i Qendrës Islame të Hamburgut dhe do të botohen periodikisht, çdo të premte. Në raste të veçanta, në festa ose përkujtime, do të botohen ligjëratat aktuale, të ndërlidhura me ndodhinë dhe datën në fjalë.
Një biografi e shkurtër e Ajetollah Dr. Riza Ramazani
I lindur në vitin 1963, në qytetin Rasht të Iranit, Ajetollah Dr. Riza Ramazani u arsimua fillimisht në Meshhed dhe pastaj në Kum, pranë dijetarëve më eminentë të kohës. Në lëminë e jurispudencës, mori mësime nga Ajetollah Fazel Lankerani, Ajetollah Behxhet Fumani, Ajetollah Nasir Makarem Shirazi, Ajetollah Khorasani dhe Ajetollah Subhani. Në lëmitë e tefsirit, filozofisë dhe gnosës (irfanit), ndër mësuesit e tij janë dijetarë e gnostikë të shquar, si Sejjid Ashtijani, Allame Xhevadi Amouli, Allame Hasanzade Amouli, Ensari Shirazi, Ahmed Beheshti dhe Askeri Gilani.
Në vitin 2005, me nota dhe vlerësime maksimale, e kaloi provimin e ixhtihadit dhe u bë muxhtehid i ligjit islam. Krahas arsimimit në qendrat tradicionale islame, Ajetollah Ramazani e ndoqi edhe planprogramin universitar dhe e fitoi titullin e doktorit të shkencave.
Që nga vitet e para të karrierës së tij, si një mësimdhënës i dhuntisur, punoi në medrese të ndryshme në Meshhed, Kum, Rasht dhe Kereç. Përveç kësaj, që nga viti 1989 ka punuar në universitete të ndryshme si ligjërues në lëndët si: morali, shkenca e haditheve, letërsia perse dhe tekstet gnostike, historia islame, kelami islam, metodologjia e fikhut, tefsiri kur’anor dhe jurispudenca islame (fikh).
Që nga viti 2000, ka qenë përgjegjës i Institutit për Fe dhe Etikë në Kum, ndërsa nga viti 2006 e këtej, është njëri nga 86 juristët islamë (muxhtehidë) që e përbëjnë Këshillin e Ekspertëve (Mexhlis-i Khobregan) të Republikës Islamike të Iranit, si organi përgjegjës për zgjedhjen ose lirimin nga detyra të Liderit Suprem, si dhe mbikqyrjen e veprimtarisë së tij.
Pasi e udhëhoqi për tre vite me rradhë Qendrën Islame “Imam Ali” në Vjenë, në prill të vitit 2009, Ajetollah Dr. Riza Ramazani u emërua udhëheqës dhe imam i Qendrës Islame të Hamburgut, që është njëra nga qendrat më të vjetra islame në Gjermani (e themeluar në vitin 1961) dhe qendra më e madhe shiite në Evropë.
Është autor i dhjetëra librave, që deri sot janë përkthyer në anglisht, gjermanisht, turqisht, arabisht dhe malajisht. Mes tjerash, mund të veçohen veprat: