1 O Allah,
O Ai që nuk kërkon shpërblim!
2 O Ai që nuk pishmanoset në dhurim!
3 O Ai që s′e shpërblen shërbëtorin e Vet me kushte!
4 Mirësia Jote është fillim i ri,
Falja Jote dhunti e begatë,
Dënimi Yt është drejtësi,
Vendimi Yt - zgjedhje për më të mirën!
5 Nëse dhuron,
Ti s′e njollos dhurimin Tënd me detyrim,
dhe nëse kursehesh,
nuk e bën duke shkelur kënd.
6 Ti i tregon mirënjohje atij që Të falënderon,
ndërkohë që Vetë Ti e ke frymëzuar të Të falënderojë.
7 Ti e shpërblen atë që Të lavdëron,
ndërkohë që Vetë Ti ia ke mësuar falënderimin Tënd.
8 Ti e mbulon atë të cilin,
po të doje,
do ta zbuloje,
dhe je bujar me atë ndaj të cilit,
po të doje,
do kurseheshe.
Që të dy meritojnë zbulimin dhe kursimin Tënd,
por veprimet Tuaja
i ke mbështetur në dhunti të begatë,
fuqinë Tënde e ke kanalizuar në durim,
9 duke e pritur me mëshirë atë që Të është mosbindur,
dhe mospërfillur atë që desh të dëmtonte vetveten.
Ti e pret kthimin e tyre pa ngutje
dhe përmbahesh nga shtyrja e tyre në pendim,
ashtu që i shkatërruari prej tyre të mos shkatërrohet
për shkakun Tënd
dhe i shkretuari prej tyre të mos shkretohet përmes
favorit Tënd,
por vetëm pasi ta kesh zgjatur justifikimin e tij
dhe argumentet e njëpasnjëshme ndaj tij,
si akt bujarie përmes faljes Tënde, O Bujar,
dhe veprim përkëdhelie përmes butësisë Tënde, O Mëshirplotë!
10 Je Ti Ai që u ke hapur një derë shërbëtorëve të Tu
një derë për tek falja Jote,
që e ke quajtur 'pendesë'.
Ti ke vendosur mbi atë derë
një tregues nga shpallja Jote,
që të mos i shmangen:
Ti ke thënë (bekuar qofshin emrat e Tu)
{pendohuni te Allahu me një pendesë të palëkundur!
Ndoshta Zoti juaj do t′ju lirojë nga veprat tuaja të liga
dhe t′ju pranojë në kopshte
nën të cilat vërshojnë lumenj,
11 ditën kur Allahu s′e turpëron Pejgamberin
dhe ata që besojnë përkrah tij,
drita e tyre u ndriçon përpara
dhe në të djathtat duar,
e ata thonë:
′Zoti ynë, plotësona dritën tonë dhe falna neve!
Vërtet, Ti je i plotfuqishëm mbi çdogjë.}
Ç′justifikim ka ai
që mbetet mospërfillës nga hyrja në atë shtëpi
pas hapjes së derës
dhe vendosjes së treguesit?
12 Je Ti Ai që e ka ngritur çmimin ndaj Vetes
në dobi të robërve të Tu,
duke u dëshiruar atyre përfitimin në ujdinë me Ty,
triumfin përmes mbërritjes tek Ti,
dhe rritjen përpara Teje,
sepse Ti ke thënë
(i bekuar është emri Yt, i lartmadhëruar je),
{kushdo që sjell një vepër të mirë
do të ketë dhjetëfishin e saj,
e kushdo që sjell një vepër të keqe
do të shpërblehet vetëm për atë}
13 Ti ke thënë se,
{shembulli i pasurisë së atyre që e harxhojnë
në rrugën e Zotit
është si ai i kokrrës së grurit
që shpërthen shtatë kallinj,
ku secili ka njëqind kokrra;
Allahu ia shumëfishon kujt dëshiron.}
Ti ke thënë,
{kush është ai që do t′i huazojë Allahut një hua të mirë,
e Ai t′ia shumëfishojë?}
Dhe Ti ke zbritur në Kur′an
ajete të ngjashme për shumëfishimin e veprave të mira.
14 Ti je që i ke caktuar
përmes fjalës Tënde nga Ghajbi Yt
dhe inkurajimit Tënd ku ndodhet fatbardhësia
drejt asaj që
- sikur t′ua kishe mbuluar -
sytë e tyre nuk do ta kishin shquar,
veshët e tyre nuk do ta kishin dëgjuar,
dhe përfytyrimet e tyre nuk do ta kishin pushtuar,
sepse Ti ke thënë,
{kujtomëni Mua
e Unë do t′ju kujtoj ju
falënderomëni Mua,
e mos jini mosmirënjohës ndaj Meje!}
Ti ke thënë,
{nëse falënderoni,
pa dyshim do t′jua shtoj të mirat,
por nëse përbuzni,
ndëshkimi Im është vërtet i tmerrshëm};
15 dhe Ti ke thënë,
{Lutmuni Mua
Unë ju përgjigjem,
s′ka dyshim se ata që mbahen tepër krenarë për të Më adhuruar
do të hynë në Xhehennem krejtësisht të poshtëruar.}
Prandaj e ke quajtur lutjen për Ty 'adhurim'
dhe përmbajtjen prej saj 'krekosje',
dhe ke kërcënuar se të përmbajturit prej saj
do të çojë në Xhehennem, në poshtërim të plotë.
16 Prandaj ata Të kujtojnë për mirësinë Tënde,
Të falënderojnë për begatinë Tënde,
Të përgjërohen me urdhrin Tënd,
dhe japin për Ty
që t′ua rrisësh të mirat;
në to qëndron shpëtimi i tyre nga zemërimi Yt
dhe ngadhënjimi i tyre përmes kënaqësisë Tënde të mirë.
17 Sikur cilado krijesë ta drejtonte një tjetër
në të ngjashmen e asaj drejt së cilës
Ti Vetë i ke drejtuar shërbëtorët e Tu
ai do të përshkruhej me bamirësi,
do të cilësohej me mirësi
dhe lavdërohej nga çdo gjuhë.
Ty pra, Të takon falënderimi
për sa kohë të gjehet mënyrë për të Të lavdëruar
dhe dëri sa të mbesin për falënderim
fjalë me të cilat mund Të lavdërohesh
dhe kuptime që mund të harxhohen në falënderim!
18 O Ai që ia tregon Veten të denjë për falënderim shërbëtorëve të Tij
përmes bamirësisë dhe begatisë,
duke vërshuar mirësi e butësi mbi ta!
Sa shumë është përhapur favori Yt ndër ne,
sa shumë është derdhur butësia Jote mbi ne,
dhe sa shumë është veçuar mirësia Jote për ne!
19 Ti na ke udhëzuar drejt
dinit Tënd që e ke zgjedhur,
besimit Tënd me të cilin je i kënaqur,
dhe rrugën Tënde që e ke lëmuar,
na ke treguar afrinë ndaj Teje
dhe arritjen për tek bujaria Jote!
20 O Allah,
nga më të zgjedhurat prej atyre detyrave
dhe më të veçantat e atyre detyrimeve
ke caktuar muajin e Ramazanit,
të cilin e ke veçuar prej muajve të tjerë,
e ke zgjedhur nga mesi i të gjitha periudhave dhe epokave,
dhe pëlqyer mbi të gjitha kohët e vitit
përmes Kur′anit dhe Dritës
që ke zbritur me të,
besimit
që ke shumëfishuar përmes tij,
agjërimit
që ke obliguar përgjatë tij,
qëndrimin në namaz
që ke inkurajuar në kohën e tij,
dhe Natën e Vendimit
që ke madhëruar në të,
natën që është {më e mirë se njëmijë muaj}.
21 Përmes saj na ke pëlqyer
përmbi bashkësitë e tjera
e përmes shkëlqyeshmërisë së saj na ke zgjedhur
me përjashtinë e popujve të besimeve të tjera.
Ne agjëruam me urdhrin Tënd ditën në të,
u falëm me ndihmën Tënde natën në të,
duke ia paraqitur veten me agjërimin dhe faljen në të
mëshirës me të cilën na ke ndihmuar përpara nesh,
dhe përmes tij gjetëm mjetet drejt shpërblimit Tënd.
Dhe Ti je përplot me çfarë Të kërkohet,
mirëbërës me atë që synohet nga begatia Jote,
dhe pranë atij që ushtrohet për afrinë Tënde.
22 Ky muaj qëndroi mes nesh
në një podium lavdërimi,
na shoqëroi
me shoqërinë e të miratuarit,
dhe na bëri dobi
me përfitimin më të shkëlqyer të krijesave të botës.
Pastaj u nis prej nesh me plotësimin e kohës së tij,
fundin e afatit të tij,
dhe përmbushjen e numrit të tij.
23 Kështu e përcollëm me lamtumirën e atij
që kur ikën na lëndon,
kur niset na mbush me zymti e vetmi,
dhe atij që i kemi borxh
një hak të mirëruajtur,
një pashkelshmëri të respektuar,
dhe një të drejtë të zbatuar.
I themi:
Paqe pastë me ty,
O më i madhi muaj i Allahut!
O festë e eulijave të Tij!
24 Paqe pastë me ty,
O më fisniku i kohëve shoqëruese!
O më i miri muaj në ditë dhe orë!
25 Paqe pastë me ty,
muaj në të cilin
pritshmëritë përqasen
dhe mirësitë shpërndahen!
26 Paqe pastë me ty,
shok
vlerëshumë kur gjehet
dhe mundues nga mungesa kur humbet,
mik i mirëpritur
që kur niset pikëllon!
27 Paqe pastë me ty,
familjar
që solle rehati kur erdhe,
duke gëzuar,
që le vetmi kur ike,
duke sjellë brengosje!
28 Paqe pastë me ty,
fqi tek i cili
zemrat zbuten
dhe mëkatet pakohen!
29 Paqe pastë me ty,
ndihmues
që ndihmove kundër Shejtanit,
shoqërues
që lehtësove shtigjet e mirëbërjes!
30 Paqe pastë me ty -
Sa shumë u bënë njerëz të lirë të Zotit gjatë teje!
Sa të lumtur ata që ta dhanë respektin e merituar!
31 Paqe pastë me ty -
Sa shumë mëkate fshive!
Sa shumë lloje gabimesh mbulove!
32 Paqe pastë me ty -
Sa i zgjatur ishe për gjynahqarët!
Sa i mrekullueshëm ishe në zemrat e besimtarëve!
33 Paqe pastë me ty,
muaj me të cilin nuk garon asnjë ditë!
34 Paqe pastë me ty,
muaj që është paqe në të gjitha çështjet!
35 Paqe pastë me ty,
shoqëria e të cilit nuk mospëlqehet,
ndenja miqësore me të cilin nuk qortohet!
36 Paqe pastë me ty,
ashtu siç na ke hyre me bekime
e na ke pastruar nga ndotja e shkeljeve!
37 Paqe pastë me ty -
ty nuk të jepet lamtumirë me mërzi
e as nuk lë agjërimi yt në shterrim!
38 Paqe pastë me ty,
objekt kërkimi përpara ardhjes,
objekt pikëllimi përpara ikjes!
39 Paqe pastë me ty -
Sa të këqija na u larguan përmes teje!
Sa të mira na mbuluan për shkakun tënd!
40 Paqe pastë me ty
dhe Natën e Vendimit
që është {më e mirë se njëmijë muaj}!
41 Paqe pastë me ty -
Sa shumë të pritëm dje!
Sa mall për ty do kemi nesër!
42 Paqe pastë me ty
dhe begatinë tënde
që tani na është ndaluar
si dhe bekimet e tuaja që kaluan
e që tani na janë shkëputur!
43 O Allah,
ne jemi ummeti i këtij muaji.
Përmes tij na ke fisnikëruar
e na ke dhënë sukses
falë mirësisë Tënde,
ndërsa mjeranët nuk dinë asgjë për kohën e tij.
Haram u është atyre begatia e tij
përshkak të mjerisë së tyre.
44 Ti je zotëruesi
i dijes së tij, me të cilën na ke preferuar
dhe i adhurimeve të tij, në të cilat na ke udhëzuar.
Ne e ndërmorëm, përmes suksesit që na dhe,
agjërimin dhe qëndrimin në namaz gjatë tij,
por me të meta,
dhe duke bërë pak nga shumë.
45 O Zot,
Ty pra Të takon lavdërimi,
në pranimin e keqbërjes
dhe rrëfimin e mospërfilljes,
dhe Ty të takon
pendesa e thurur fort në zemrat tona
dhe kërkimfalja e mërmëritur sinqerisht nga gjuhët tona.
Shpërblena,
megjithë neglizhimin që na kaploi në këtë muaj,
me një shpërblim përmes të cilit
të mund të arrijmë begatinë e dëshiruar prej tij
dhe të fitojmë larminë e depove të tij të lakmuara!
46 Na e bëj të detyrueshme faljen Tënde
pse nuk Ta dhamë hakun këtë muaj
dhe bëji jetët tona që shtrihen përpara
ta arrijnë muajin e ardhshëm të Ramazanit!
Kur të na e kesh mundësuar ta arrijmë,
ndihmona në kryerjen e adhurimit për të cilin je i denjë,
bëj ta ndërmarrim bindjen që Ti meriton,
e dhurona vepra të mira
që të mund të Ta përmbushim hakun
në këta dy muaj të muajve të kohës.
47 O Allah,
sa për mëkatet e mëdha dhe të vogla
që kemi kryer në këtë muaj tonin,
gabimet në të cilat kemi rënë,
dhe shkeljet që kemi bërë
me qëllim apo në harresë,
duke i bërë zullum vetvetes
ose dhunuar nderimin e duhur ndaj të tjerëve,
bekoje Muhammedin dhe Pasardhjen e tij,
mbulona me mbulimin Tënd,
falna me faljen Tënde,
mos na vendos para syve të inaçorëve për shkak të saj,
mos i zgjat ndaj nesh gjuhët e përfolësve,
dhe përfshina në atë që do na çlirojë dhe shlyejë
çfarëdo që s′ke miratuar tek ne gjatë tij,
përmes mëshirës Tënde që nuk soset
dhe begatisë Tënde që nuk pakësohet!
48 O Allah,
bekoje Muhammedin dhe Pasardhjen e Tij,
rivishna me të qenit të sprovuar nga muaji ynë,
bekona në këtë ditë të bajramit dhe ndërprerjes së agjërimit,
bëje atë nga ditët më të mira që na kanë kaluar,
më e madhja në tërheqjen e faljes Tënde,
dhe më fshirësja ndaj mëkateve tona,
e na i fal gjynahet - të fshehta dhe të hapta!
49 O Allah,
me kalimin e këtij muaji
na bëj t′i kapërcejmë shkeljet tona,
me nisjen e tij
na bëj të nisemi nga veprat tona të këqija,
dhe caktona gjatë tij mes njerëzve më të lumtur,
më të begatët në pjesë,
dhe më të plotët në rrizk!
55 O Allah,
kur dikush e kalon këtë muaj siç duhet kaluar,
e ruan pashkelshmërinë e tij siç duhet ruajtur,
i mban kufizimet e tij siç duhen mbajtur,
i druhet gabimeve në të siç duhet druajtur,
ose kërkon afrinë Tënde me ndonjë akt afrim-kërkimi
që e bën të detyrueshme mbi të kënaqësinë Tënde të mirë
dhe e shtrin drejt tij mëshirën Tënde,
jepna si ajo nga pasuria Jote
e dhuroje mbi ne shumëfish përmes begatisë Tënde,
sepse begatia Jote nuk pakësohet,
thesaret Tuaja nuk sosen por vërshojnë,
minierat Tuaja të bamirësisë nuk shterohen
e dhurimi Yt është plot kënaqësi!
51 O Allah,
bekoje Muhammedin dhe Pasardhjen e tij
dhe shkruaj për ne shpërblimet
e atij që ka agjëruar në të
ose që Të ka adhuruar gjatë tij
deri në Ditën e Ringjalljes!
52 O Allah,
ne Të pendohemi në ditën tonë të ndërprerjes së agjërimit,
që ua ke caktuar
besimtarëve
festim dhe gëzim
e për ummetin e besimit Tënd
kohë për mbledhje dhe tubim,
nga çdo shkelje që kryem,
vepër të keqe që dërguam,
apo mendimi të lig që fshehëm,
me pendimin e atij që nuk synon kthim në mëkat
dhe që nuk do t′i kthehet shkeljes më pas,
një pendim të patundshëm larg dyshimit dhe lëkundjes.
Pranoje pra nga ne,
kënaqu me ne,
dhe ngulitna në të!
53 O Allah,
pajisna me frikë nga dënimi i kërcënuar
dhe mall për shpërblimin e premtuar,
që ta gjejmë
kënaqësinë e asaj për të cilën Të përgjërohemi
dhe pikëllimin e asaj nga e cila Të kërkojmë strehë!
54 Dhe vendosna me Ty mes pendestarëve,
që ua ke bërë dashurinë Tënde detyrim
dhe të cilëve ua ke pranuar
kthimin në bindjen ndaj Teje!
O Më i Drejti i të drejtëve!
55 O Allah,
trego durim ndaj etërve dhe nënave tona
dhe tërë njerëzve të fesë sonë,
atyre që kanë kaluar dhe atyre që do të vijnë,
gjer në Ditën e Kijametit!
56 O Allah,
bekoje pejgamberin tonë Muhammed dhe Pasardhjen e tij,
siç i ke bekuar melekët e Tu të afruar,
bekoje atë dhe pasardhjen e tij,
siç i ke bekuar profetët e Tu të nisur,
bekoje atë dhe pasardhjen e tij,
siç i ke bekuar shërbëtorët e Tu të mirë
dhe edhe më mirë se kaq, O Zot i botërave! -
një bekim, bereqeti i të cilit të na mbërrijë,
përfitimi i të cilit të na vijë,
dhe përmes të cilit lutja jonë të përmbushet!
Ti je më bujari i atyre që u përgjërohet,
më mjaftuesi i atyre në të cilët ka besim,
më dhuruesi prej atyre që u kërkohet begati,
Ti je i fuqishëm mbi çdo gjë!
Shqipëroi: Edin Q. Lohja
9 Tetor 2006/16 Ramazan 1427.
